माघ महिनासम्ममा २८ अर्ब बढी रकमको मोबाइल सेट भित्रिए
काठमाडौँ, १७, फागुन । चालु आर्थिक वर्षको माघ महिनासम्ममा विभिन्न देशबाट नेपालमा ४० लाखभन्दा बढी मोबाइल सेट आयात भएको छ । भन्सार विभागको तथ्यांक अनुसार २०७८ साउदेखि माघ मसान्तसम्मको अवधिमा २८ अर्ब ३८ करोड रुपैयाँभन्दा बढी रकमको ४० लाख ५ हजार ८०४ थान मोबाइल सेट नेपाल भित्रिएको छ ।
अघिल्लो आर्थिक वर्ष २०७७/७८ को सुरुवाती सात महिनामा नेपालले विभिन्न देशबाट २४ अर्ब ६ करोड ८१ लाख ७० हजार रुपैयाँको ४३ लाख ६८ हजार ८७२ थान मोबाइल सेट खरिद गरेको थियो । मबाइल सेटको आयातबाट नेपाल सरकारले ४ अर्ब ४९ करोड ११ लाख ९४ हजार रुपैयाँ राजस्व उठाएको छ ।
अघिल्लो वर्षको तुलनामा चालु आर्थिक वर्षको पहिलो सात महिनामा नेपालले मोबाइल सेट आयतमा ४ अर्ब ३१ करोड ७४ लाख ५७ हजार रुपैयाँ बढी खर्च गरेको छ ।
गत आर्थिक वर्ष २०७७/७८ मा नेपालले विभिन्न देशबाट ३६ अर्ब ९० करोड ४५ लाख ८४ हजार रुपैयाँको मोबाइल सेट खरिद गरेको थियो । सो मुल्यमा नेपालमा ७० लाख ३० हजार ३६६ थान मोबाइल सेट नेपाल भित्रिएको भन्सार विभागले जनाएको छ ।
