चीनमा कोरोनाले २ वर्षको रेकर्ड तोड्यो
काठमाडौँ, ४, चैत । छिमेकी देश चीनमा कोरोनाको नयाँ संक्रमणले गत २ वर्षको रेकर्ड तोडेको छ । यसैगरी जर्मनी, इटाली, फ्रान्ससमेत कयौं युरोपेली देश र दक्षिण कोरियाजस्ता एसियाली देशमा पनि कोरोनाको संक्रमण बढ्न थालेको छ ।
कोरोनाको यो ताजा लहरका पछाडि ‘स्टेल्थ ओमिक्रोन’ भनिँदै आएको ओमिक्रोनको सब भेरियन्ट ‘बीए २’ लाई जिम्मेवार मानिँदै आएको छ । चीन कोरोना महामारीको सुरुवातपछि यो घातक भाइरसबाट सर्वाधिक हमला झेलिरहेको छ र पछिल्ला केही सातादेखि त्यहाँ कोरोनाको नयाँ केसले रेकर्ड बनाएको छ ।
२० फेब्रुअरीपछि चीनमा दैनिक संक्रमितको संख्या लगातार बढिरहेको छ र विगत ५ दिनदेखि त्यहाँ प्रत्येक दिन एक हजारभन्दा बढी नयाँ केस देखिएका छन् ।१४ मार्चमा चीनमा कोरोनाको ३ हजार ६०२ केस देखिएका छन् । यो २०२० को फेब्रुअरीपछि कै बढी हो ।
