दोहोरो अंकले घट्यो शेयर बजार, कारोबार रकममा पनि गिरावट
काठमाडौँ, १७, चैत । साताको अन्तिम कारोबारको दिन (बिहीबार) नेपाल स्टक एक्सेन्च(नेप्से) दोहोरो अंकले घटेको छ ।
हिजो बुधबार साढे ४० अंक बढीले बढेको शेयर बजार कारोबारको अन्तिम समयसम्म आइपुग्दाँ २३.९५ अंकले घटेर २५४४.३० को बिन्दुमा पुगेको हो । नेप्से ०.९३ प्रतिशतले घटेको हो । यस्तै, सेन्सेटिभ परिसूचक पनि ४.६० अंकले घटेर ४७५.४७ विन्दुमा पुगेको छ ।
कारोबार भएका १३ उपसमूहमध्ये व्यापारबाहेक बाँकी सबै उपसमूहको शेयर घटेको छ । अन्तिम समयसम्म कारोबारमा आएका कूल २२८ वटा कम्पनीको ३७ लाख ८७ हजार कित्ता शेयर खरिदबिक्री हुँदा एक अर्ब ८९ करोड एक लाख ६४ हजार रूपैयाँ बराबरको कारोबार भएको छ ।
बिहीबार इमर्जिङ नेपाल कम्पनी लिमिटेडको सर्वाधिक कारोबार भएको छ । कम्पनीको ९ करोड २३ लाख ८४ हजार रूपैयाँ बराबरको कारोबार भएको हो ।
आज इमर्जिङ नेपाल कम्पनी लिमिटेड, राष्ट्र उत्थान लघुवित्त वित्तीय संस्था लिमिटेड र नेष्डो समृद्ध लघुवित्त वित्तीय संस्था लिमिटेडको शेयरमूल्यमा सकारात्मक सर्किट लागेको छ ।
