२ अर्ब २० करोडको ऋणपत्र बिक्रीमा ल्याउँदै सेञ्चुरी बैंक
काठमाडौँ, १२, वैशाख । सेञ्चुरी कमर्सियल बैंक लिमिटेडले २ अर्ब २० करोड रुपैयाँ बराबरको ऋणपत्र बिक्रीमा ल्याउने भएको छ । बैंकले १ हजार रुपैयाँ अंकित दरका कुल २२ लाख इकाइ बिक्री गर्ने भएको हो ।बैंकले १०.५० प्रतिशत ब्याजदर प्रदान गर्नेगरी दश वर्ष अवधिको ‘सेञ्चुरी डिबेन्चर २०८८’ नामक ऋणपत्र निष्कासन गर्न लागेको हो ।
उक्त ऋणपत्र मध्ये १३ लाख २० हजार इकाइ व्यक्तिगत तबरबाट बिक्री गरिनेछ भने ८ लाख ८० हजार इकाइ सर्वसाधारणका लागि निष्कासन गरिनेछ ।ऋणपत्र निष्काशन गर्न बैंकले नेपाल धितोपत्र बोर्ड (सेबोन) बाट चैत २९ गते अनुमति पाएको थियो । निष्काशन अनुमति पाएको २ महिनाभित्र ऋणपत्र जारी गरिसक्नुपर्ने व्यवस्था छ ।
बैंकको ऋणपत्रको निष्काशन तथा बिक्री प्रबन्धक ग्लोबल आइएमई क्यापिटल लिमिटेड रहेको छ ।
