एक वर्षमा निर्जीवन बिमा कम्पनीले गरे ३९ अर्ब बढी कुल बिमा शुल्क आर्जन
काठमाडौँ, २९, साउन । गत आर्थिक वर्ष (आव) २०७८/०७९ को अन्त्यसम्म निर्जीवन बिमा कम्पनीले ३९ अर्ब १६ करोड बढी कुल बिमा शुल्क आर्जन गरेका छन् । बिमा समितिले सार्वजनिक गरेको गत आवको तथ्यांक अनुसार २० निर्जीवन बिमा कम्पनीले उक्त कुल बिमा शुल्क आर्जन गरेका हुन् ।
पछिल्लो समय बिमा व्यवसायको विस्तार बढ्दै गएपछि कम्पनीले बिमालेख बिक्रीबाट आर्जन गर्ने कुल बिमा शुल्क पनि बढ्दै गएको छ ।
२० निर्जीवन बिमा कम्पनीमध्ये सर्वाधिक कुल बिमा शुल्क आर्जन गर्नेमा शिखर इन्स्योरेन्सले गरेको छ । यो कम्पनीले एक वर्षको अवधिमा पाँच अर्ब ९२ लाख रुपैयाँ कुल बिमा शुल्क आर्जन गरेको छ ।
समितिका अनुसार गएको वर्ष २० निर्जीवन बिमा कम्पनीमध्ये आठ कम्पनीले दुई अर्बभन्दा बढी कुल बिमा शुल्क आर्जन गरेका छन् ।
जसमध्ये सबैभन्दा बढी शिखर इन्स्योरेन्स कम्पनीले पाँच अर्बभन्दा बढी कुल बिमा शुल्क आर्जन गरेको छ ।
यस्तै, सगरमाथा इन्स्योरेन्स कम्पनीले तीन अर्ब १० करोड बिमा शुल्क आर्जन गरेको बिमा समितिले जनाएको छ । राष्ट्रिय बिमा कम्पनीले दुई अर्ब ६४ करोड, नेको इन्स्योरेन्स लिमिटेडले दुई अर्ब ८५ करोड, एनएलजी इन्स्योरेन्स कम्पनीले दुई अर्ब ३७ करोड कुल बिमा शुल्क आर्जन गरेको छ ।
सिद्धार्थ इन्स्योरेन्स लिमिटेडले २ अर्ब ६१ करोड, प्रिमियर इन्स्योरेन्स कम्पनीले दुई अर्ब १४ करोड, हिमालयन इन्स्योरेन्स कम्पनीले दुई अर्ब ६ करोड कुल बिमा शुल्क आर्जन गरेका छन् ।
यो वर्ष जनरल इन्स्योरेन्स कम्पनीले सबैभन्दा कम बिमा शुल्क आर्जन गरेको छ । उक्त कम्पनीले ९० करोड १२ लाख कुल बिमा शुल्क आर्जन गरेको छ ।
