रिपब्लिका मिडिया र माई खोला हाइड्रोपावरले दिए आईपीओका लागि आवेदन
काठमाडौँ, ३, कात्तिक । नेपाल धितोपत्र बोर्डमा नेपाल रिपब्लिका मिडिया लिमिटेड र माई खोला हाइड्रोपावर लिमिटेडले प्राथमिक सेयर (आईपीओ) निष्कासन गर्न आवेदन दिएका छन् । रिपब्लिका मिडियाले ४३ लाख ५३ हजार कित्ता आईपीओ निष्कासन गर्न बोर्डमा कात्तिक २ गते आवेदन दिएको हो ।
यो कम्पनीले प्रतिकित्ता १०० रुपैयाँ अंकित मूल्यमा ४३ करोड ५३ लाख रुपैयाँ बराबरको आईपीओ निष्कासन गर्न लागेको हो । कम्पनीको आईपीओ बिक्री प्रबन्धकमा मेगा क्यापिटल मार्केटस लिमिटेड रहेको छ ।
त्यस्तै, माई खोलाले १९ लाख २१ हजार ५६८ कित्ता आईपीओ निष्कासन गर्न बोर्डमा असोज ३० गते आवेदन दिएको हो । यो कम्पनीले पनि प्रतिकित्ता १०० रुपैयाँ अंकितदरमा १९ करोड २१ लाख ५६ हजार ८०० रुपैयाँको आईपीओ निष्कास गर्ने भएको हो ।
कम्पनीको आईपीओ बिक्री प्रबन्धकमा प्रभु क्यापिटल लिमिटेड रहेको छ । धितोपत्र बोर्डबाट यी कम्पनीले आईपीओ निष्कासन अनुमति पाएपछि सर्वसाधारणमा आईपीओ निष्कासन गर्नेछन् । माई खोलाले भने आयोजना प्रभावित क्षेत्रका स्थानीयलाई आईपीओ निष्कास गरेरमात्र सर्वसाधारणमा आईपीओ निष्कासन गर्नेछ ।
