सेयर बजार १६ अंक घट्यो, कारोबार खुम्चियो
काठमाडौँ, १७, कार्तिक । सेयर बजारको परिसूचक नेप्से बिहीबार १६.१४ अंकले घटेको छ । सो अंकको कमीपछि नेप्से १९२२ अंकमा कायम भएको छ । परिसूचक मात्रै नभई कारोबार रकममा पनि कमी आएको छ । बुधबार १ अर्ब ४६ करोडको कारोबार भएकोमा बिहीबार जम्मा ८९ करोड ८९ लाखमा खुम्चियो ।
कुल १५३ कम्पनीको मूल्य घट्दा २७ को बढ्यो भने ५ को स्थिर रह्यो । जीवन बीमा १ र निर्जीवन बीमा ०.६ अंक बढे भने अरु सबै उपसमूह घटे । बैंकिङ ११, विकास बैंक ४१, फाइनान्स १९, होटल तथा पर्यटन २०, जलविद्युत् २७, उत्पादन १३, माइक्रोफाइनान्स ४७, अन्य १७ र व्यापार उपसमूह १९ अंक घटे ।
युनिलिभरको मूल्य सबैभन्दा धेरै ६.५ प्रतिशत बढेर प्रतिकित्ता १९ हजार ५ सय कायम भयो । कम्पनीले प्रतिकित्ता १२१५ रुपैयाँ लाभांश दिने घोषणा गरेपछि मूल्य बढेको हो । कारोबार रकमका आधारमा एभरेस्ट बैंक, गरिमा विकास बैंक संस्थापक, अरुण काबेली, एनआईसी एसिया बैंक र शिवम् सिमेन्ट क्रमश: अगाडि रहे ।
