सगरमाथा जलविद्युतको आईपीओ आजदेखि बिक्री खुला
काठमाडौँ, ८, चैत्त । सगरमाथा जलविद्युत कम्पनीले आजदेखि सर्वसाधारणका लागि साधारण सेयर (आईपीओ) बिक्री खुलाएको छ । यसअघि कम्पनीले आयोजना प्रभावित क्षेत्रका लागि र वैदेशिक रोजगारीमा गएका नेपालीहरुका लागि आईपीओ बिक्री गरिसकेको छ । आजदेखि बिक्री खुलाइएको आईपीओमा १२ गतेसम्म आवेदन दिन पाइनेछ । तोकिएको समयमा मागअनुसारको आवेदन नपरेमा चैत २२ गतेसम्मको समय थपिनेछ । सर्वसाधारणले कम्पनीको आयोजनामा न्यूनतम कित्तादेखि १० हजार कित्तासम्म आवेदन दिन सक्नेछन् ।
कम्पनीले ९.६ मेगावाट क्षमताको सुपरमाई जलविद्युत ए आयोजना निर्माण गरिरहेको छ । र, आयोजनाले जारी पूँजीको ३९ प्रतिशतले हुन आउने ४३ करोड ६८ लाख रुपैयाँ बराबरको सेयर बिक्री गर्न छुट्याएको थियो । यसअनुसार १ अर्ब १२ करोड रुपैयाँको ३९ प्रतिशतका दरले ४३ लाख ६८ हजार रुपैयाँ कित्ता बिक्रीको योजना बनेको थियो । यसमध्ये वैदेशिक रोजगारीमा गएकाहरुलाई १० प्रतिशतका दरले हुन आउने ४ लाख ३६ हजार ८०० कित्ता सेयर छुट्याइएको थियो । यसका साथै, सामूहिक लगानी कोषलाई २ लाख १८ हजार ४०० कित्ता र कर्मचारीका लागि १ लाख ३१ हजार कित्ता सेयर बिक्री गरिसकेको छ ।
