विदेशमा ऊर्जा व्यापार गर्नसक्ने कानून तत्काल बनाउन माग
काठमाडौँ, ६, वैशाख । प्रतिनिधि सभा सदस्य श्यामकुमार घिमिरेले निजी क्षेत्रले विदेशमा ऊर्जा व्यापार गर्नसक्ने कानून बनाउन माग गरेका छन् ।
निजी क्षेत्रलाई विद्युतको आपूर्ति र व्यापारमा सहभागी हुन पाउने व्यवस्था कानूनमा उल्लेख गर्नुपर्ने उनको माग छ । प्रतिनिधि सभाको बैठकमा उनले यस्तो माग गरेका हुन् ।
‘हिजोबाट शुरु भएको पावर समिटमा प्रधानमन्त्रीले आगामी २०२५ सम्ममा हिउँदमा पनि विद्युत निर्यात गर्नसक्ने कुरा बताउनुभएको रहेछ । त्यसका लागि बजारिकरणलाई सशक्त बनाउन निजी क्षेत्रलाई पि टू पि माध्यमबाट विदेशमा ऊर्जा व्यापार गर्नसक्ने कानून तत्काल बनाइयोस् भनि जोडदार माग गर्दछु’ उनले भने ‘अन्य लोकतान्त्रिक मुलुकमा झैँ नेपालमा पनि निजी क्षेत्रलाई विद्युतको आपूर्ति र व्यापारमा सहभागी हुन पाउने व्यवस्था सोही कानूनमा उल्लेख भएर आओस् भन्नेपनि माग गर्दछु ।
यसले नेपाल विद्युत प्राधिकरणलाई समेत थप प्रतिष्पर्धी र प्रभावकारी बनाउनेछ भन्ने कुरा जोडदारसँग उठाउन चाहन्छु । उक्त कानून कहिलेसम्म आउँछ ? त्यो कुरा विभागिय मन्त्रीले सदनलाई जानकारी गराउनु हुन जोडदार अपिल गर्दछु ।’
उनले उक्त कानून कहिलेसम्म आउँछ भन्ने पनि विभागिय मन्त्रीले सदनलाई जानकारी गराउनुपर्ने बताए ।
