मुक्तिनाथ विकास बैङ्कको नाफा ८० करोड ६२ लाख, खुद ब्याज आम्दानी कति ?
काठमाडौँ, ७, वैशाख । मुक्तिनाथ विकास बैङ्क लिमिटेडको चालु आर्थिक वर्ष २०७९/८० को तेस्रो त्रैमाससम्मको अपरिष्कृत वित्तीय विवरण प्रकाशित भएको छ ।
बैङ्कले प्रकाशित गरेको विवरणअनुसार चालु आ.व.को तेस्रो त्रैमासमा बैङ्कले ८० करोड ६२ लाख रुपैयाँ नाफा आर्जन गरेको छ । गत आर्थिक बर्षको सोही अवधिमा भने बैङ्कले १ अर्ब २ करोड रुपैयाँ नाफा कमाएको थियो । गत बर्षको तुलनामा यस बर्ष बैङ्कले आर्जन गरेको नाफा रकम नाफा २१ प्रतिशतले कम हो ।
खुद ब्याज आम्दानी २६.०९ प्रतिशत बढेको छ भने कुल सञ्चालन आम्दानी १९.८४ प्रतिशतले बृद्धि भए पनि इम्पेरमेन्ट चार्ज बढेका कारण बैङ्कको नाफामा दबाव पुगेको देखिन्छ ।
बैङ्कको खराब कर्जा अघिल्लो आ.व.को तेस्रो त्रैमासमा ०.१७ प्रतिशत रहेकोमा समीक्षा अवधिमा बढेर १.९९ प्रतिशत पुगेको छ । जसको प्रभावले बैङ्कको इम्पेरिमेन्ट चार्ज बढेर ७७ करोड पुगेको छ । यस अवधिमा बैङ्कको सञ्चालन मुनाफा २१.०३ प्रतिशत घटेको छ।
बैङ्कले गत आर्थिक वर्षको मुनाफाबाट १३.५० प्रतिशत बोनस शेयर वितरण गरी चुक्ता पूँजी ६ अर्ब ४२ करोड पुर्याएको छ ।
चैत मसान्तसम्म बैङ्कले निक्षेप रकम ७.४९ प्रतिशतले बढाएर १ खर्ब १२ अर्ब १८ करोड रुपैयाँ पुर्याएको छ भने कर्जा लगानी ५.८० प्रतिशतले बढाएर ९१ अर्ब ८४ करोड रुपैयाँ कायम भएको छ । त्यस्तै, बैङ्कको जगेडा कोषमा भने यस अवधिमा ४ अर्ब १८ करोड रुपैयाँ रहेको छ ।
नाफासँगै बैङ्कको प्रतिशेयर आम्दानी पनि घट्न पुगेको छ । यस अवधिमा ७.३२ रुपैयाँ घटेर १६.७४ पैसा कायम भएको छ । त्यस्तै, बैङ्कको मूल्य आम्दानी अनुपात २४.१३ गुणा र प्रतिशेयर नेटवर्थ १३७ रुपैयाँ ४९ पैसा छ।
