डेंगी फैलन नदिन लार्भा नस्ट गर्दै महानगर, औषधीका बारेमा यस्तो भन्छन् मेयर शाह
काठमाडौ, ५ भदौ । काठमाडौं महानगरपालिकाका मेयर बालेन शाहले डेंगी फैलन नदिने लामखुट्टेको लार्भा नष्ट गर्न नेपालमै पहिलो पटक वायो लार्भिसिद नामक जैविक औषधी प्रयोग गर्न लागिएको जनाएका छन् ।
देशभरी डेंगुको प्रकोप बढ्दै गइरहेका बेला मेयर शाहले आज बिहान सामाजिक सञ्जालमार्फत काठमाडौंमा रोग नियन्त्रणका लागि लामखुट्टे र त्यसका लार्भालाई बाहेक कसैलाई पनि हानी नगर्ने औषधी प्रयोग गर्न लागेको जनाएका हुन् ।
‘काठमाडौँमा डेंगी रोग फैलन नदिन लाम्खुट्टेको लार्भा नष्ट गर्न नेपालमै पहिलो पल्ट वायो लार्भिसिद छर्कदैछौ ।यो औषधि जैविक हो । यसले लामखुट्टे र त्यसका लार्भालाईबाहेक कसैलाई पनि हानी गर्दैन । यो विषादि होइन,’उनले लेखेका छन्,‘औषधिलाई पानीको माथिल्लो भागमा छर्कनु पर्दछ । यसले लार्भाको पेटमा विष उत्पन्न गर्छ । यसबाट उसको पाचन प्रक्रिया नष्ट हुन्छ । यसबाट पूर्ण विकसित हुन नपाउँदै लार्भा मर्छ ।
औषधिले डेंगीसहित, फिलारिया, औलो (मलेरिया), चिकन्नीयाजस्ता रोग फैलाउने सबै प्रजातिका लामखुट्टेका लार्भा र प्युपा नष्ट हुनेछ ।’महानगरले डेंगी रोगको बारेमा परामर्श दिन निःशुल्क हटलाइन टेलिफोन ११८० बाट २४ सै घण्टा सञ्चालनमा गरिएको जनाउँदै उनले अस्पताल जानु परे १०२ नम्बर सम्पर्क गरेर निःशुल्क एम्बुलेन्स प्रयोग गर्न सक्ने व्यवस्था मिलाइएको पनि जानकारी दिएका छन् ।
