भिजन लुम्बिनीको आईपीओमा पर्यो मागभन्दा बढी आवेदन
काठमाडौं । भिजन लुम्बिनी उर्जा कम्पनीको आईपीओमा मागभन्दा बढी आवेदन परेको छ । कात्तिक १६ गतेदेखि सर्वसाधारणका लागि आईपीओ निष्काशन गरेको आईपीओमा मागभन्दा २.३४ गुणा बढी आवेदन परेको हो ।
सिडिएससीको पछिल्लो विवरण अनुसार उक्त आइपिओमा एकै दिनमा तीन लाख ८४ हजार सात सय २७ जनाले ४८ लाख ५८ हजार सात सय ४० कित्ताका लागि आवेदन दिएका छन् । जबकी कम्पनीले कुल २० लाख ७५ हजार २८५ कित्ता साधारण सेयर मात्रै सर्वसाधारणका लागि निष्काशन गरेको हो । आइपिओमा आवेदन दिने मिति कात्तिक २० गतेसम्म रहेको छ ।
कम्पनीले पहिलो चरणमा आयोजना प्रभावित क्षेत्रका स्थानीय, सामूहिक लगानी कोष र कम्पनीका कर्मचारीहरुलाई बाँडफाँट गर्दा बाँकी रहेको ४ लाख ८७ हजार ९१० कित्ता सेयर थपेर आवेदन खुला गरेको हो । यस आईपीओको निष्कासन तथा बिक्री प्रबन्धकमा मुक्तिनाथ क्यापिटल लिमिटेड रहेको छ ।
कम्पनीले कास्कीको माछापुच्छ्रे गाउँपालिकामा २५ मेगावाटको सेती नदी जलविद्युत आयोजनाको निर्माण गरेको छ भने यसै वर्ष देखि उत्पादन शुरुको पनि तयारी गरेको छ । यस योजनाको कुल अनुमानित लागत ५ अर्ब २० करोड रुपैयाँ रहेको छ भने प्रतिमेगावाट कुल अनुमानित लागत २० करोड ८० लाख रुपैयाँ रहेको छ।
