एनसेलको सेयर किनबेच प्रकरणबारे छानबिन गर्न समिति गठन गरिने
काठमाडौं । एनसेलको सेयर किनबेच प्रकरणबारे विस्तृत छानबिन गर्न समिति गठन गरिने भएको छ । प्रधानमन्त्री पुष्पकमल दाहाल प्रचण्डले सत्तारुढ दलका शीर्ष नेताहरुसँग मंगलबार बालुवाटारमा छलफल गरेलगत्तै संचार तथा सूचना प्रविधि मन्त्रालयले वक्तव्य जारी गर्दै छानबिन समिति गठन हुने जनाएको हो ।
संभवत बिहीबारको मन्त्रिपरिषद् बैठकले छानबिन समिति बनाउनेछ । र छानबिनबाट कुनै अनियमिता भएको पाइएमा सम्बन्धित सबैलाई तत्काल कानुन बमोजिम कडा कारबाहीको दायरामा ल्याउने सञ्चार मन्त्री रेखा शर्माले जानकारी दिइन् । ‘क्याबिनेटबाट यस सम्बन्धमा अध्ययन तथा छानबिन समिति बन्नेछ, उनले भनिन्, त्यसले सिफारिस गरे बमोजिम सरकार अगाडि बढ्ने छ ।’ उनले समितिमा को को रहनेबारे मन्त्रिपरिषदको बैठकले नै निर्णय गर्ने पनि बताइन् ।
नियामक निकाय नेपाल दूरसञ्चार प्राधिकरणको स्वीकृत नलिएको र प्राधिकरणलाई जानकारी समेत नगराई अस्वभाविक मूल्यमा भएको कारोबार गरेको देखिएको सरकारको बुझाइ छ । मन्त्रालयद्धारा जारी विज्ञप्तिका अनुसार प्रधानमन्त्रीले सोमबार नै छानबिन गर्न निर्देशन दिइसकेका छन् । ‘प्रचलित कानुनी प्रावधान, अन्तर्राष्ट्रिय विधिको पालना, यस्ता क्रियाकलापबाट दुरसञ्चार क्षेत्र र विदेशी लगानीमा पर्ने अवसर, राजश्वमा पर्ने प्रभावबारे विस्तृत अध्ययन तथा छानबिन गर्नेछ,’ विज्ञप्तिमा लेखिएको छ ।
