_bMj5daRuGK.jpg)
जसपा नेपालले चैत्र मसान्तसम्म स्थानीय तहहरूको अधिवेशन सम्पन्न गर्ने तयारी
काठमाडौँ । जनता समाजवादी पार्टी (जसपा) नेपालले चैत्र मसान्तसम्म स्थानीय तहअन्तर्गत वडा, पालिका र जिल्ला समितिहरूको अधिवेशन सम्पन्न गर्ने योजना बनाएको छ। पार्टीका प्रचार प्रसार तथा प्रकाशन विभाग प्रमुख पूर्ण बस्नेतका अनुसार, पालिका समितिको जिम्मेवारीमा खटाइएका केन्द्रीय अभियन्ताहरूको समन्वयमा स्थानीय तहको अधिवेशन कार्यलाई तीव्रता दिइएको छ।
पार्टीको परिपत्रअनुसार, स्थानीय तहको अधिवेशनपछि प्रदेश समिति र पहिचानमा आधारित राष्ट्रिय समितिको अधिवेशन गर्नुपर्नेछ। प्रदेश समिति र राष्ट्रिय समितिको अधिवेशन वैशाख २५ गतेभित्र र वैशाख मसान्तसम्म सम्पन्न गर्ने निर्णय गरिएको प्रमुख बस्नेतले बताए।
यसैगरी, जसपा नेपालले 'जनतासँग जसपा नेपाल, आधारभूत सङ्गठन निर्माण अभियान' अन्तर्गत पार्टी प्रवेश कार्यक्रम, सदस्यता वितरण र नवीकरणजस्ता सङ्गठनात्मक गतिविधिहरूलाई तीव्रता दिएको छ। पार्टीको यो अभियान २०८२ वर्षको वैशाख मसान्तसम्म जारी रहने बताइएको छ।
