प्रधानमन्त्री ओली र प्रधानमन्त्री पे थोङ् थान् शिनावातबीच भेटवार्ता
काठमाडौं । नेपालका प्रधानमन्त्री केपी शर्मा ओली र थाइल्याण्डकी प्रधानमन्त्री पे थोङ् थान् शिनावातबीच बैंककमा भेटवार्ता भएको छ। यस भेटमा परराष्ट्रमन्त्री आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक विकास सल्लाहकार युवराज खतिवडा, मुख्यसचिव एकनारायण अर्याल, र परराष्ट्र सचिव अमृतबहादुर राई सहभागी थिए।
भेटपछि, संस्कृति र पर्यटन क्षेत्रमा सहकार्यसम्बन्धी सम्झौतापत्रमा हस्ताक्षर गरिएको छ। यसैगरी, दुई देशका गैरसरकारी र व्यावसायिक संस्थाबीच विभिन्न समझौतापत्रहरू आदानप्रदान भएका छन्। सम्झौतापत्रहरूमा हस्ताक्षरपछि, दुवै प्रधानमन्त्रीले संयुक्त पत्रकार सम्मेलन गरेका छन्। त्यसपछि, प्रधानमन्त्री शिनावातले प्रधानमन्त्री ओलीको सम्मानमा दिवभोज आयोजना गरेकी छन्।
प्रधानमन्त्री ओलीले आज थाइ नरेश महा बजिरालोङकर्नसँग शिष्टाचार भेट गर्ने कार्यक्रम पनि रहेको छ। यस भ्रमणको अवसरमा, प्रधानमन्त्री ओली बैंककमा आयोजना हुने छैटौं बिम्स्टेक शिखर सम्मेलनमा पनि सहभागी हुनेछन्। नेपाल र थाइल्याण्ड बीच कूटनीतिक सम्बन्ध स्थापना भएको ६५ वर्षपछि यो भ्रमण भएको हो।
