वीरगञ्ज महानगर कमिटीको मतदान निषेधाज्ञा हटेपछि मात्र
काठमाडौं । नेपाल कम्युनिष्ट पार्टी (नेकपा) एमालेको वीरगञ्ज महानगर कमिटीको नयाँ नेतृत्व चयनको प्रक्रिया हाल अनिश्चित अवस्थामा रहेको छ। चार दिनअघि उम्मेदवारहरूको नामांकन (नोमिनेशन) प्रक्रिया सम्पन्न भए पनि, स्थानीय प्रशासनद्वारा लागू गरिएको निषेधाज्ञाका कारण मतदान प्रक्रिया स्थगित भएको छ।
अध्यक्ष पदका उम्मेदवार सुन्दर राउत कुर्मीका अनुसार, वीरगञ्जमा नोमिनेशनको दिनै कर्फ्यू लागू गरिएको थियो, जसका कारण निर्वाचन प्रक्रिया रोकिएको हो। अहिले पनि निषेधाज्ञा जारी रहेकाले, मतदान सम्भव छैन। निषेधाज्ञा हटेपछि अध्यक्ष मण्डलको बैठक बसेर मतदानको मिति तय गरिने उनले बताएका छन्।
नयाँ नेतृत्व चयनका लागि ८३ पदका लागि निर्वाचन हुँदैछ, जसमा अध्यक्ष पदमा २ जना, उपाध्यक्षमा २ जना, सचिवमा ४ जना र उपसचिवमा ४ जनाको उम्मेदवारी परेको छ। अध्यक्ष पदमा सुन्दर राउत कुर्मी र नवराज शर्माको उम्मेदवारी परेको छ।
