आखिर यो कहिलेसम्म ?
काठमाडौँ । केर्खा नगरपालिका–५ स्थित रतुवामाई वृक्षारोपण आयोजना अन्तर्गत कार्यरत ४३ जना कर्मचारीले गत वर्षको असारदेखि हालसम्म कुनै पनि तलब र भत्ता प्राप्त गर्न सकेका छैनन्। स्थायी, करार र दैनिक ज्यालादारी गरी कार्यरत यी कर्मचारीहरूले १० महिनादेखि पारिश्रमिकविहीन सेवा दिइरहेका छन्।
आयोजना प्रमुख भक्तिप्रसाद गौतमका अनुसार, कार्यक्रमको स्वीकृतिका लागि आवश्यक पैदावार विकास समितिको अध्यक्ष पद लामो समयदेखि रिक्त रहेकोले आयोजनाका गतिविधिहरू अघि बढ्न सकेका छैनन्। यसका कारण तलब र भत्तासमेतका पारिश्रमिक उपलब्ध हुन नसकेको उनले बताए।
रतुवामाई वृक्षारोपण आयोजना अन्तर्गत २,७५३.७६ हेक्टर वनक्षेत्र रहेको छ। यस क्षेत्रको पूर्वी सिमाना कनकाई नदी, पश्चिमी सिमाना रतुवा नदी, उत्तरी सिमाना चुलाचुली फेदी र दक्षिणी सिमाना पूर्व–पश्चिम राजमार्गले घेरिएको छ। यस वनक्षेत्रमा वृक्षारोपण र वन संरक्षणका कार्यक्रमहरू सञ्चालन हुँदै आएका छन्।
हालसम्म समितिको अध्यक्ष नियुक्ति नभएकाले काठ बिक्री लगायतका कार्यक्रमहरू पनि रोकिएका छन्, जसले गर्दा कर्मचारीहरूलाई तलब र भत्तासमेतको पारिश्रमिक उपलब्ध गराउन समस्या भइरहेको छ।
