स्वास्थ्य मन्त्रालय घेराउ गर्न पुगेका चिकित्सकलाई प्रहरीको रोक
काठमाडौँ - नेपालका चिकित्सकहरूले सरकारले तोकेको न्यूनतम पारिश्रमिक नदिएको र आवासीय चिकित्सकहरूको सेवा सुविधा कार्यान्वयन नगरेको भन्दै स्वास्थ्य मन्त्रालय घेराउ गर्ने प्रयास गरेका छन्। माइतीघर मण्डलाबाट प्रदर्शन गर्दै स्वास्थ्य मन्त्रालय जान खोजेका चिकित्सकहरूलाई प्रहरीले रोक्यो। यस क्रममा केहीबेर प्रहरी र चिकित्सकबीच धकेलाधकेल भएको थियो।
चिकित्सक संघले स्वास्थ्य मन्त्रीसँगको सम्झौताअनुसार आवासीय चिकित्सकलाई सरकारी आठौँ तहको सेवा सुविधा दिने निर्णय कार्यान्वयन नगरेको भन्दै असन्तुष्टि जनाएको छ। नेपाल चिकित्सक संघका अध्यक्ष डा. अनिलविक्रम कार्कीले स्वास्थ्य मन्त्रीले हस्ताक्षर गरेको निर्णय कार्यान्वयन नगरी चिकित्सकलाई रोक्ने काम भएको बताए।
चिकित्सक संघले आफ्ना माग पुरा नभए आगामी बैशाख १२ गते देशभरका आकस्मिक र सघन उपचार सेवा बाहेकका सम्पूर्ण स्वास्थ्य सेवा ठप्प पार्ने चेतावनी दिएको छ।
