_3tjfpQmJ1T.jpg)
चालु आर्थिक वर्षमा सप्तरी जिल्लामा १३ वटा पुल निर्माण
काठमाडौँ - सप्तरी जिल्लामा चालु आर्थिक वर्षको नौ महिनामा १३ वटा पुल निर्माणाधीन छन्। लहानस्थित सडक डिभिजन कार्यालयका प्रमुख आशुतोष कर्णका अनुसार, हालसम्म ६ वटा पुल निर्माण सम्पन्न भएका छन् भने ७ वटा पुलको काम अन्तिम चरणमा पुगेको छ।
सम्पन्न भएका पुलहरूमा शम्भुनाथ नगरपालिका–११ देवधारमा रु ६ करोड ५७ लाख ८२ हजारको लागतमा, छिन्नमस्ता गाउँपालिका घोडदह नदीमा रु १ करोड ९१ लाख ९२ हजारको लागतमा, कनकटा–९ र बेल्ही–५ जोड्ने सडकमा पर्ने मुत्तनी खोलामा रु ४ करोड ४ लाख ५४ हजारको लागतमा, राजविराज–छिन्नमस्ता सडकबाट बेल्हा–६ र ५ भएर बग्ने सप्तरीको घोडदह खोलामा रु ४ करोड ८५ लाख ६३ हजारको खर्चमा, छिन्नमस्ता गाउँपालिका–५ राजविराज–छिन्नमस्ता सडकअन्तर्गत खिरखौका नदीमा रु ५ करोड ४२ लाख २० हजारको लागतमा, र राजविराज–कुनौली सडकमा पर्ने महुली घाडन खोलामा रु ६ करोड १३ लाख ५४ हजारको लागतमा पुल निर्माण सम्पन्न भएका छन्।
निर्माणाधीन पुलहरूमा छिन्नमस्ता गाउँपालिका–१ ललापट्टी–बुटनपोखरी भलवाही पुल रु ३ करोड ७३ लाख ८२ हजारको लागतमा ९७ प्रतिशत सम्पन्न भएको छ। सोही निर्माण कम्पनीले रु ३ करोड ६२ लाख ७४ हजारको लागतमा विसहरिया–१ स्थित भलवाही खोलामाथि बनाइरहेको पुलको काम अन्तिम चरणमा पुगेको छ। रुपनी गाउँपालिका–६ दुधैला खोलामा नयाँ वस्ती नजिकै रु ६ करोड ५३ लाख ७५ हजारका लागतमा निर्माणाधीन पुलको ८० प्रतिशत काम सम्पन्न भएको छ। फकहा–बरदहीको बीच मुत्तनी नदीमा पनि पुल निर्माण भइरहेको छ। उक्त पुलको वित्तीय प्रगति ८३.५८ प्रतिशत छ भने भौतिक प्रगति ८५ प्रतिशत रहेको सडक डिभिजन कार्यालयले जनाएको छ।
सप्तरी जिल्लामा पुल निर्माण तीव्र गतिमा जारी छ, जसले सडक सञ्जाल विस्तारमा महत्वपूर्ण योगदान पुर्याउने अपेक्षा गरिएको छ।
