_u8CXkJSoeG.jpg)
आन्दोलनरत शिक्षकहरूलाई धम्क्याएको भन्दै शिक्षक महासंघको आपत्ति
काठमाडौँ - नेपाल शिक्षक महासंघले काठमाडौँमा आन्दोलनरत शिक्षकहरूलाई धम्क्याएको भन्दै आपत्ति जनाएको छ। महासंघका अध्यक्ष लक्ष्मीकिशोर सुवेदीले एक विज्ञप्ति जारी गर्दै यस्तो कार्य बन्द गर्न स्थानीय तहहरूलाई आग्रह गरेका छन्।
विज्ञप्तिमा भनिएको छ, 'काठमाडौँ केन्द्रित शैक्षिक सडक आन्दोलनमा सहभागी भएका थुप्रै प्रधानाध्यापक शिक्षक र कर्मचारी साथीलाई धम्काउने, सरुवा गर्ने, राजीनामा दिन दबाब दिने जस्ता कार्य कतिपय स्थानीय तहबाट भएको सूचना आइरहेका छन्। संविधान प्रदत्त सामूहिक सौदाबाजीको अधिकार उपयोगप्रति सम्मान गरी यस्ता कार्य नगर्न नगराउन सबै स्थानीय तहहरूलाई आग्रह गर्दे यो परिस्थितिबाट विचलित नहुन सबै शिक्षक-कर्मचारी साथीहरूमा अनुरोध गर्दछौँ।'
महासंघले गत वर्षको चैत २० गतेदेखि काठमाडौँ केन्द्रित शैक्षिक सडक आन्दोलन गरिरहेको छ। आन्दोलन चलेको पनि २५ दिन नाघेको छ। गुणस्तरीय विद्यालय शिक्षा, विद्यार्थी र शिक्षक-कर्मचारी मैत्री विद्यालय शिक्षा ऐन जारी गराउने उद्देश्यबाट गरिएको यो अन्तिम र निर्णायक आन्दोलन भएको महासंघको भनाइ छ। 'यो आन्दोलनलाई अझ सशक्त बनाउँदै हाम्रा माग मुद्दा समेटिएको अग्रगामी ऐन जारी गर्ने सवालमा अब दरिलो र अन्तिम धक्का आवश्यक भएको छ। यस निर्णायक घडीमा देशभरका सबै शिक्षक कर्मचारी साथीहरूलाई काठमाडौँ आउनुहुन आग्रह गर्दछौँ,' विज्ञप्तिमा भनिएको छ।
यसअघि पनि नेपाल शिक्षक महासंघ र सरकारबीचको सहमतिमा राहत शिक्षकहरूको असन्तुष्टि रहेको थियो। राहत शिक्षक संघका प्रतिनिधिहरूले सहमतिमा आफूहरूको माग समेटिएको छैन भन्दै आन्दोलन जारी राखेका थिए। त्यसपछि सरकारले राहत शिक्षकहरूको माग सम्बोधन गर्न पाँचबुँदे सहमति गरेको थियो। तर, केही राहत शिक्षक संघहरूले उक्त सहमतिमा असन्तुष्टि जनाउँदै आन्दोलन जारी राखेका छन्।
यसरी, नेपाल शिक्षक महासंघले आन्दोलनरत शिक्षकहरूको अधिकारको रक्षा गर्दै, धम्की र दबाबका विरुद्ध आवाज उठाएको छ।
