प्रतिनिधिसभा सदस्य माया राईविरुद्ध प्रहरीले पूरक अनुसन्धान
काठमाडौँ -
नेपाली कांग्रेसकी प्रतिनिधि सभा सदस्य माया राईविरुद्ध स्वर्णलक्ष्मी सहकारी संस्थामा रकम हिनामिना प्रकरणमा पूरक अनुसन्धान गरिने भएको छ। शनिबार साँझ बुढानीलकण्ठ–१०, कपनबाट पक्राउ परेकी राईलाई आइतबार अदालतबाट म्याद थप गरी थप अनुसन्धान अघि बढाइने एसपी अपिल बोहराले जानकारी दिएका छन्।
राईलाई कालीमाटीस्थित स्वर्णलक्ष्मी बहुउद्देश्यीय सहकारी संस्थामा रकम अपचलनमा संलग्न भएको आरोप छ। उनले सहकारीमा सदस्य र सहसचिवको रूपमा कार्यसम्पादन गरेकी थिइन्। यसअघि प्रहरीले रवि लामिछानेसहित ३९ जनाविरुद्ध मुद्दा दायर गरेको थियो, तर राईको नाम अभियोगपत्रबाट हटाइएको थियो।
प्रहरीका अनुसार, राईविरुद्ध ठगी र सङ्गठित अपराध मुद्दामा पूरक अनुसन्धान अघि बढाइनेछ। अदालतबाट म्याद थप गरेपछि बयान लिइने र थप प्रमाण सङ्कलन गरी सरकारी वकिल कार्यालयमा प्रतिवेदन पेस गरिने एसपी बोहराले बताएका छन्।
