गगन थापाविरुद्ध अदालतको अवहेलना मुद्दा दर्ता
काठमाडौँ - नेपाली कांग्रेसका महामन्त्री गगन थापाविरुद्ध अदालतको अवहेलना मुद्दा दर्ता भएको छ। अधिवक्ता अनन्त लुइँटेलले आइतबार सर्वोच्च अदालतमा रिट निवेदन दायर गरेका हुन्। सर्वोच्च प्रशासनले उक्त निवेदनमा मंगलबारको पेसी तोकिदिएको छ।
थापाले वैशाख ११ गते काठमाडौंमा आयोजित लोकतन्त्र दिवसको कार्यक्रममा संवैधानिक आयोगका पदाधिकारीहरूको नियुक्तिमा अदालतले 'डिल' गरिरहेको आरोप लगाएका थिए। उनले भनेका थिए, "अहिले सम्मानित अदालतले अख्तियार दुरुपयोग अनुसन्धान आयोगलगायतका विषयलाई दुई/तीन वर्षदेखि 'तँलाई हान्दिऊँ' भनेर झुलाएर राखेको छ। कहिले हेर्दाहेर्दै भन्छ, कहिले भ्याइनभ्याइ भन्छ, कहिले भोलि हेर्ने भन्छ। त्यसले अदालतको विश्वसनीयतामाथि प्रश्न उठाउँछ।"
थापाका यी टिप्पणीलाई अदालतको अवहेलना ठहर गर्दै अधिवक्ता लुइँटेलले सर्वोच्च अदालतमा रिट निवेदन दायर गरेका हुन्। सर्वोच्च प्रशासनले उक्त निवेदनमा मंगलबारको पेसी तोकिदिएको छ।
