रौतहटमा भन्सार छलीका सामानसहित एक तस्कर पक्राउ
काठमाडौँ - जिल्ला प्रहरी कार्यालय रौतहटको गस्ती टोलीले भन्सार छली गरिएका कपडा र दुई थान मोटरसाइकलसहित एक तस्करलाई पक्राउ गरेको छ।
पक्राउ पर्नेमा ईशनाथ नगरपालिका–१ का ३७ वर्षीय राकेश पैसवान रहेका छन्। प्रहरीको विशेष सूचनाको आधारमा गएको गस्ती टोलीले गौर नगरपालिका–४ स्थित लालबकैया नदीको छेउबाट रु २,२३,००० मूल्य बराबरका अवैध कपडा र नम्बर नभएका दुई थान मोटरसाइकलसहित उनलाई नियन्त्रणमा लिएको हो।
बरामद गरिएका सामानको कुल मूल्य रु ३,२३,००० रहेको र सबैलाई आवश्यक कारबाहीका लागि सोमबार साँझ जिल्ला भन्सार कार्यालय गौरमा बुझाइएको जिल्ला प्रहरी प्रवक्ता डिएसपी दीपक कुमार रायले जानकारी दिएका छन्।
