तीनकुनेमा बस, भ्यान र मोटरसाइकलको ठक्करमा एक जनाको मृत्यु
काठमाडौँ - काठमाडौँको तीनकुनेमा आज बिहान ६ः३५ बजे भएको सडक दुर्घटनामा एक जनाको मृत्यु भएको छ भने तीन जना घाइते भएका छन्। कोटेश्वरबाट बानेश्वरतर्फ आइरहेको बा ३ ख ७०६२ नम्बरको बसले सोही दिशाबाट आइरहेको बा.प्र.०१-०२६ च २९२७ नम्बरको मारुती भ्यान र बा.प्र.०२-०५३ प ३८४७ नम्बरको मोटरसाइकललाई ठक्कर दिएको थियो।
मोटरसाइकलको पछाडि सवार नुवाकोट घर भई हाल ललितपुर धोबीघाट बस्ने वर्ष २३ की नगिना तामाङको उपचारको क्रममा ट्रमा सेन्टरमा मृत्यु भएको हो। मोटरसाइकल चालक रामेछाप घर भई नयाँ बजार बस्ने वर्ष २७ का पदम थापा मगर, भ्यान चालक काभ्रे मण्डन देवपुर घर भई हाल शान्तिनगर बस्ने वर्ष ३५ का रत्न बहादुर सार्की र बसमा सवार दोलखा घर भएकी २४ वर्षीया मेनुका बुढाथोकी घाइते भएका छन्। उनीहरूको उपचार भइरहेको छ।
घटनास्थलमा प्रहरी वृत्त बानेश्वर र काठमाडौँ उपत्यका ट्राफिक महाशाखाका प्रहरी टोली पुगेका थिए। बस चालक, भ्यान र मोटरसाइकल प्रहरी वृत्त बानेश्वरको नियन्त्रणमा राखिएको छ। बस भने काठमाडौँ उपत्यका ट्राफिक महाशाखा रामशाहपथको नियन्त्रणमा रहेको प्रहरीले जनाएको छ।
