किराँत समुदायले उँभौली पर्व मनाउँदै
काठमाडौँ - आज, वैशाख शुक्ल पूर्णिमाका अवसरमा, किराँत राई समुदायले आफ्नो महत्वपूर्ण पर्व उँभौली मनाउँदैछन्। यस पर्वमा राई, लिम्बू लगायतका जातजातिहरूले प्रकृतिको पूजा आराधना गर्दै चण्डी पूर्णिमा मनाउने परम्परा रहेको छ ।
किराँत समुदायमा प्रत्येक वर्ष वैशाख शुक्ल पूर्णिमाका दिन बाली लगाउनुअघि गाउँगाउँका भूमेस्थानमा बाली राम्रो होस् भन्ने उद्देश्यले प्रकृतिको पूजा गर्ने परम्परा रहेको छ । मार्गशीर्ष शुक्ल पूर्णिमाका दिन बाली भित्र्याएर जाडो छल्न बेँसी झरेका मानिस आजदेखि उँभो लाग्छन्। वैशाख शुक्ल पूर्णिमापछि गर्मी बढ्दै जाने र बेँसीमा रहेका यो समुदायका मानिस लेकतिर उँभो लाग्ने भएकाले पनि यसको नाम उँभौली रहेको हो ।
किराँत समुदायको विश्वास अनुसार, वैशाख शुक्ल पूर्णिमादेखि चराचुरुङ्गीलगायत जङ्गली जनावर पनि उँभो लाग्ने मान्यता छ । यस पर्वका अवसरमा चण्डी नाचसमेत नाचिन्छ।
