युवतीलाई यौन पेसामा लगेको आरोपमा महिला पक्राउ ,वीरगञ्ज
काठमाडौँ - वीरगञ्ज महानगरपालिका–१६ नगवाकी २० वर्षीया अलिया खातुनलाई एक युवतीलाई नयाँ कपडा किनिदिन्छु भन्दै भारतको रक्सौलमा लगेर यौन पेसामा लगाएको आरोपमा जिल्ला प्रहरी कार्यालय पर्साले पक्राउ गरेको छ।
गत वैशाख २१ गते खातुनले एक युवतीलाई नयाँ कपडा किनिदिन्छु भन्दै रक्सौल पुर्याएकी थिइन्। त्यहाँ लगेर ती युवतीलाई यौन पेसामा लगाएको आरोपमा खातुनलाई पक्राउ गरिएको हो। पक्राउ परेकी खातुनविरुद्ध पर्सा जिल्ला अदालतबाट मानव बेचबिखन तथा ओसारपसारको कसुरमा ५ दिनको म्याद लिएर अनुसन्धान अघि बढाइएको पर्सा प्रहरीका सूचना अधिकारी तथा डीएसपी किशोर लम्सालले जानकारी दिए।
यसअघि पनि खातुनले अन्य बालिकाहरुलाई यसैगरी भारत लगेर यौन पेसामा लगाउने गरेको भन्ने सूचना प्राप्त भएकोले त्यसतर्फ पनि अनुसन्धान अघि बढाइएको प्रहरीले बताएको छ।
