सिरहामा पत्रकारमाथि प्रहरीको अभद्र व्यवहार, प्रेस स्वतन्त्रताको उल्लङ्घनको आरोप
काठमाडौँ - सिरहाको गोलबजार नगरपालिका–४ स्थित बर्धमान अस्पतालमा शल्यक्रिया गरिएकी सुकरीको मृत्यु प्रकरणको रिपोर्टिङका लागि गएका पत्रकार सुरेशकुमार रायमाथि अस्पतालको सुरक्षामा खटिएका नेपाल प्रहरीका प्रहरी निरीक्षक राज यादवले गालीगलौज र धम्की दिएको आरोप लागेको छ। रायका अनुसार, आइतबार दिउँसो मोटरसाइकल चढेर अस्पताल पुगेपछि प्रहरी निरीक्षक यादवले हेलमेट नलगाएको भन्दै गालीगलौज गर्दै हेलमेट खोसेका थिए। थप रूपमा, रायलाई धम्की दिँदै मोटरसाइकल समेत नियन्त्रणमा लिन खोजिएको उनले बताएका छन्।
रायका अनुसार, "प्रहरी निरीक्षकले 'हेलमेट राम्रोसँग लगाउन आउँदैन, सिकाइदिउँ' भन्दै गालीगलौज गरे। समाचार संकलन गरिरहेका बेला उनले हेलमेटको विषयमा गाली गर्दै मोटरसाइकल नियन्त्रणमा लिन खोजे। जब मैले 'कसरी लगाउने हेलमेट?' भने, उनले 'अझ मुख–मुखै लाग्छस्, बढी बोल्छस्' भन्दै धम्क्याए।"
उक्त घटना अस्पताल परिसरमा भएको र पत्रकार महासंघ सिरहाले यसप्रति गम्भीर आपत्ति जनाउँदै दोषीमाथि कारबाहीको माग गरेको छ। महासंघका अनुसार, पत्रकारमाथिको यस्तो दुर्व्यवहार प्रेस स्वतन्त्रताको उल्लङ्घन हो र यसप्रति गम्भीर ध्यान दिनुपर्ने आवश्यकता छ।
