सांसद जुली महतो: 'ओली सरकार ढल्ने दिवास्वप्न मात्र'
काठमाडौँ - नेकपा एमालेकी सांसद जुली महतोले वर्तमान प्रधानमन्त्री केपी शर्मा ओली नेतृत्वको सरकार ढल्ने कुरा दिवास्वप्न मात्र भएको बताएकी छन्। प्रतिनिधिसभाको विशेष समयमा बोल्दै सांसद महतोले नेपाली कांग्रेस र नेकपा एमाले मिलेर बनेको सरकार स्थिर र जिम्मेवार भएको दाबी गरिन्।
सांसद महतोले भनिन्, "अहिले कांग्रेस र एमालेको स्थिर र जिम्मेवार सरकार छ। यो सरकार बनेसँगै सत्ताको खेल होइन, स्थायित्वको युग सुरु भएको छ। कसैले सरकार ढल्छ भन्ने सोचेको छ भने त्यो दिवास्वप्न हुनेछ।"
उनले थपिन्, "अबको राजनीति सत्ताको खेल होइन, जनताले स्थायित्व र प्रगतिको अपेक्षा गरेका छन्। जनताको अपेक्षामाथि षड्यन्त्र गर्नु लोकतन्त्रको अपमान हो। जनताले संघर्षमार्फत ल्याएको लोकतन्त्र जनताले नै बचाउनेछन्।"
