पाकिस्तानी सेनामाथि भारतीय आक्रमण: ११ सैनिकको मृत्यु, ७८ घाइते
काठमाडौँ - पाकिस्तानले भारतीय सेनाको आक्रमणमा आफ्ना ११ सैनिकको मृत्यु भएको र ७८ जना घाइते भएको जनाएको छ। मृत्यु हुनेमा ६ जना सेनाका र ५ जना वायुसेनाका सैनिक रहेका छन्। यसैगरी, ४० जना सर्वसाधारणको पनि मृत्यु भएको र १२१ जना घाइते भएको पाकिस्तानी मिडिया डनले जनाएको छ।
प्रधानमन्त्री शाहबाज शरीफले भारतीय आक्रमणमा ज्यान गुमाउने सैनिकका परिवारका लागि 'मरकज–ए–हक' नामक राहत प्याकेजको घोषणा गरेका छन्। यसमा ज्यान गुमाउनेका परिवारलाई १ करोड रुपैयाँ र घाइतेलाई १० देखि २० लाख रुपैयाँसम्मको क्षतिपूर्ति दिइनेछ।
यसैबिच, प्रधानमन्त्री शाहबाज शरीफले मंगलबार दिउँसो १२ बजे सर्वदलीय बैठक बोलाएका छन्। यस बैठकमा भारत विरुद्ध सुरु गरिएको 'अपरेशन बन्यान–अन–मर्सूस' सम्बन्धी छलफल गरिनेछ।
