बारा जिल्लाको हुलाक कार्यालयका प्रमुख र चार कर्मचारीविरुद्ध भ्रष्टाचार मुद्दा दायर
काठमाडौँ - बारा जिल्लास्थित हुलाक कार्यालयका प्रमुख नायब सुब्बा बलिराम प्रसाद कुर्मी र चार अन्य कर्मचारीविरुद्ध विशेष अदालतमा भ्रष्टाचार मुद्दा दायर गरिएको छ। अख्तियार दुरुपयोग अनुसन्धान आयोगले भ्रष्टाचार निवारण ऐन, २०५९ अन्तर्गत दायर गरेको आरोपपत्रमा उनीहरूले हुलाक बचत बैंकमा संकलित रकमको अपचलन गरेको आरोप लगाइएको छ।
कुर्मीले २०६० सालदेखि हुलाक बचत बैंकको जिम्मेवारी सम्हाल्दै आएका थिए। अख्तियारको अनुसन्धान अनुसार, उनले नगदी रजिस्टरमा प्रविष्टि नगरी, लेजर बुक र पासबुकमा मात्र विवरण देखाएर सरकारी रकमको दुरुपयोग गरेका छन्।
आरोपपत्रमा उल्लेख गरिएको छ कि कुर्मी र तत्कालीन कार्यालय प्रमुख जयलाल प्रसाद साह कानू, अदालत प्रसाद कुर्मी, बुन्नी प्रसाद यादव, सुरेन्द्र प्रसाद यादव र सुजित कुमार साहले मिलेमतो गरी बचतकर्ताबाट संकलित रकम आपसी बाँडफाँड गरी ५ करोड ३५ लाख ६६ हजार २ सय ७९ रुपैयाँ ३३ पैसा दुरुपयोग गरेका छन्।
विशेष अदालतमा दायर आरोपपत्र अनुसार, सबै आरोपितहरूविरुद्ध बिगो कायम गरी सोही रकम बराबर कैद र जरिवानाको माग गरिएको छ।
