नक्साल ढुंगेधारामा पानीको प्रवाह पुनः सुरु, २५ वर्षपछि पुनर्निर्माण सम्पन्न
काठमाडौँ - काठमाडौँको नक्सालस्थित ऐतिहासिक ढुंगेधारा (गाः हिटी)मा अढाई दशकपछि पानीको प्रवाह पुनः सुरु भएको छ। काठमाडौँ महानगरपालिकाको सम्पदा विभागमार्फत गरिएको पुनर्निर्माण कार्य सम्पन्न भई, अहिले सो हिटीमा दुईवटा स्रोतबाट निरन्तर पानी प्रवाह भइरहेको छ।
स्थानीयका अनुसार, २०५५ सालदेखि पानीको निकास बन्द भएको थियो। पुरातत्त्व विभागको २०४२ सालको अभिलेखमा पनि बेलाबेला पानीको निकासमा समस्या आएर हिटी बन्द हुने उल्लेख गरिएको छ। पुनर्निर्माणका क्रममा पानीको निकास थुनेका तीन घरलाई प्रतिघर २ लाख रुपैयाँका दरले जरिवाना गरिएको थियो। यसबाट प्राप्त रकमले निकास खोल्नका लागि प्रयोग गरिएको थियो।
