हिमताल फुटेर हुम्लाको तिलगाउँ तहसनहस, सांसद लामाले सरकारको ध्यानाकर्षण गराए
काठमाडौं - नेकपा माओवादी केन्द्रका सांसद छिरिङ डम्डुल लामा भोटेले हुम्लाको लिमीस्थित तिलगाउँमा १ जेठमा हिमताल फुटेर गाउँ तहसनहस भएको भन्दै सरकारको ध्यानाकर्षण गराएका छन्। प्रतिनिधिसभाको सोमबारको बैठकमा आकस्मिक समय लिएर बोल्दै उनले हिमाली क्षेत्रमा रहेका सबै ताल जोखिममा रहेको भन्दै तत्काल उद्धार र राहतको व्यवस्था गर्न सरकारसँग माग गरेका छन्।
सांसद लामाले भने, “४७ सय मिटरमाथि रहेको हिमताल फुट्दा तिलगाउँमा जनधनको क्षति पुगेको छ। काठका पाँचवटा पुल बगाएको छ, चार पाँच सय रोपनी खेतीमा लाग्ने सिंचाइकुलो क्षतविक्षत बनाएको छ भने १५ किलोवाट क्षमताको विद्युत परियोजना तहसनहस भएको छ।”
उनले थपे, “१८ घरपरिवारका ३२ जना नजिकैको बारीमा त्रिपाल लगाएर बसेका छन्। २१ महिला, ९ पुरुष र दुई बालक जोखिममा छन्। अप्ठेरो र त्रसित अवस्थामा बसिरहेका छन्।”
