सुरेन्द्र पाण्डेले ५०० र १००० का नोटमा प्रतिबन्ध लगाउने प्रस्ताव गरे
काठमाडौं - सत्तारुढ नेकपा एमालेका उपाध्यक्ष तथा पूर्व अर्थमन्त्री सुरेन्द्र पाण्डेले नेपालमा भ्रष्टाचार नियन्त्रणका लागि ५०० र १००० दरका नोटमा प्रतिबन्ध लगाउने सुझाव दिएका छन्। मंगलबार नेपाली कांग्रेसको नीति तथा योजना विभागले आयोजना गरेको कार्यक्रममा बोल्दै उनले यस्तो प्रस्ताव गरेका हुन्।
पाण्डेले भने, “मैले धेरै ठाउँमा भनेको छु, भ्रष्टाचार नियन्त्रण गाह्रो काम छैन। ५०० र १००० को नोट बन्द गरिदिऔँ, नछापौं नागरिकलाई अहिले नै आतंकित नपारौं। ०८५ पछि ५००० र १००० को नोट चल्दैन भनेर भनिदिऔं।”
उनले थपे, “अब सरकारले सय रुपैयाँको मात्रै नोट छाप्नुपर्छ। कसैले एक करोड घुस खानुपर्यो भने पनि एक ट्रक लिनुपर्यो, त्यसका लागि कोठा बुक गरेर भाडामा राखेर ताला लगाएर पैसा राख्नुपर्यो। यो सम्भव हुँदैन।”
