चितुवाको आक्रमणबाट बालिकाको मृत्यु, बालापुरमा चक्काजाम र विरोध
काठमाडौं - बर्दियाको गुलरिया नगरपालिका–५ बालापुरमा चितुवाको आक्रमणमा परेर ६ वर्षीया सायरा थारुको मृत्यु भएको छ। बुधबार बिहान घरको शौचालय गएकी बालिकामाथि चितुवाले आक्रमण गरेको जिल्ला प्रहरी कार्यालय बर्दियाले जनाएको छ।
प्रहरी नायव उपरीक्षक (डीएसपी) चक्रबहादुर डमरपालका अनुसार बालिकाको शव बर्दिया अस्पताल गुलरियामा राखिएको छ। पछिल्ला दिनमा गुलरिया क्षेत्रमा चितुवाको आक्रमण बढ्दो क्रममा छ।
चितुवाले चारभन्दा बढी बालबालिकाको ज्यान लिइसकेको भन्दै आक्रोशित बालापुरवासीले जिल्ला प्रशासन कार्यालय अगाडि धर्नासहित चक्काजाम गरेका थिए।
चितुवा नियन्त्रणका लागि जिल्लास्थित सुरक्षा समितिमा सहमति भएपछि चक्काजाम हटाइएको गुलरिया–५ का वडा सदस्य सोवेन्द्र बहादुर चौधरीले जानकारी दिए। तर, स्थानीयहरूले आफ्ना मागहरू तत्काल पूरा नभए पुनः आन्दोलनमा उत्रिने चेतावनी दिएका छन्।
