नवलपरासीको देवचुलीमा एम्बुलेन्स र स्कुल भ्यान ठोक्किँदा चालकको मृत्यु, पाँचजना घाइते
काठमाडौं - देवचुली–२ दुम्कोली चोकमा एम्बुलेन्स र स्कुल भ्यान ठोक्किँदा भएको दुर्घटनामा एक जनाको मृत्यु भएको छ भने पाँचजना घाइते भएका छन्।
जिल्ला प्रहरी कार्यालयका अनुसार, नारायणगढतर्फ बिरामी बोकेर जाँदै गरेको ना ४ च ४६१६ नम्बरको एम्बुलेन्स र विपरीत दिशाबाट आउँदै गरेको बा २० च ७२ नम्बरको स्कुल भ्यान एकापसमा ठोक्किँदा दुर्घटना भएको हो।
दुर्घटनामा दिव्य एकेडेमी बोर्डिङ स्कुल, केउरेनीका भ्यान चालक देवचुली–१ का ५२ वर्षीय कुलप्रसाद सुवेदीको उपचारका क्रममा चितवन मेडिकल कलेज, भरतपुरमा बिहान ९:२० बजे मृत्यु भएको प्रहरी नायब उपरीक्षक मधु नेपालले जानकारी दिए।
त्यसैगरी दुर्घटनामा घाइते भएका दुई विद्यार्थीसहित अन्य चारजनालाई मनकामना अस्पताल, भरतपुरमा उपचारका लागि पठाइएको छ।
