सार्वजनिक यातायात बन्द हुँदा सशस्त्र प्रहरीको निःशुल्क बस सेवा काठमाडौंमा सञ्चालन
काठमाडौं - सार्वजनिक यातायात बन्द भएपछि यात्रुहरू मर्कामा परेका बेला सशस्त्र प्रहरी बल नेपालले काठमाडौं उपत्यकामा निःशुल्क बस सेवा सञ्चालनमा ल्याएको छ।
सशस्त्र प्रहरी बलका सहप्रवक्ता डिएसपी शैलेन्द्र थापाका अनुसार यात्रुहरूको सहजताका लागि दुईवटा निःशुल्क बस सेवा सञ्चालन गरिएको हो।
एक बस सशस्त्र प्रहरी बल नेपाल प्रधान कार्यालयबाट सञ्चालन भई स्वयम्भू, कलंकी, कालिमाटी, त्रिपुरेश्वर, रत्नपार्क हुँदै कोटेश्वरसम्म चल्नेछ। अर्को बस भने स्वयम्भू, कलंकी, सातदोबाटो, कोटेश्वर, महाराजगञ्ज हुँदै चक्रपथ परिक्रमा गर्नेछ।
"यात्रा गर्न समस्या परेका सर्वसाधारणका लागि यी बसहरू निःशुल्क रूपमा उपलब्ध हुनेछन्," डिएसपी थापाले जानकारी दिए।
यातायात व्यवसायीहरूले विभिन्न माग राख्दै सार्वजनिक सवारी साधन सञ्चालन बन्द गरेपछि नेपाल प्रहरीले पनि सोमबार दुईवटा निःशुल्क बस सञ्चालनमा ल्याइसकेको छ।
