दाङको तुलसीपुरमा किशोरबीचको कुटपिटले लिए एकको ज्यान
काठमाडौँ - दाङको तुलसीपुर उपमहानगरपालिका–९ बेलुवामा दुई किशोरबीच भएको कुटपिट घटनामा एक किशोरको मृत्यु भएको छ। कुटपिटबाट गम्भीर घाइते भएका रुकुम बाँफिकोट गाउँपालिकाका १४ वर्षीय विराज गिरीको उपचारको क्रममा नेपालगञ्जस्थित नर्सिङ होममा निधन भएको प्रहरीले जनाएको छ।
प्रहरीका अनुसार गिरीको टाउकोमा गम्भीर चोट लागेको थियो। बुधबार १५ वर्षीय यज्ञ वली र गिरीबीच सामान्य भनिएको झगडा कुटपिटमा परिणत भएको थियो।
इलाका प्रहरी कार्यालय तुलसीपुरका प्रहरी निरीक्षक सूर्य रानाका अनुसार कुटपिटमा संलग्न यज्ञ वलीलाई नियन्त्रणमा लिइएको छ र घटनाबारे थप अनुसन्धान भइरहेको छ।
