४ करोड ठगी आरोपमा पिसी इन्फोटेककी सञ्चालक श्रुति रौनियार पक्राउ
काठमाडौँ - चार करोड ३२ लाख रुपैयाँभन्दा बढी रकम ठगी गरेको आरोपमा पिसी इन्फोटेक प्रालिकी सञ्चालक श्रुति रौनियारलाई प्रहरीले पक्राउ गरेको छ। उनका विरुद्ध ठगी, आपराधिक विश्वासघात र बैंकिङ कसुरसम्बन्धी मुद्दामा पर्सा प्रहरीले अनुसन्धान गरिरहेको छ।
काठमाडौं उपत्यका अपराध अनुसन्धान कार्यालयको टोलीले बिहीबार बिहान रौनियारलाई पक्राउ गरी पर्सा पठाएको कार्यालयका एसपी काजीकुमार आचार्यले जानकारी दिए।
धनुषास्थित रमण/विकास एन्ड ब्रदर्स जेभीका तर्फबाट अख्तियार प्राप्त अरुणकुमार शाहले गत चैत २२ गते पर्सा जिल्ला प्रहरी कार्यालयमा रौनियारविरुद्ध उजुरी दिएका थिए।जाहेरीका आधारमा पर्सा जिल्ला अदालतबाट चैत २६ गते पक्राउ अनुमति लिएपछि प्रहरीले सर्कुलर जारी गरी खोजी गर्दै आएको थियो।
पर्साका डीएसपी किशोर लम्सालका अनुसार, "कसरी ठगी भयो भन्नेबारे अनुसन्धान भइरहेको छ," उनले जानकारी दिए।
