नुवाकोटमा बाढीको वितण्डा, बजार क्षेत्रमा भौतिक संरचनामा ठूलो क्षति
१० भदौ, काठमाडौं । रसुवा सीमा क्षेत्रबाट आएको ठूलो बाढीका कारण नुवाकोटका विभिन्न स्थानमा भौतिक संरचनामा ठूलो क्षति पुगेको छ। नुवाकोटका प्रमुख जिल्ला अधिकारी शम्भुप्रसाद रेग्मीका अनुसार बाढी तटीय बजार क्षेत्रमा पसेपछि बेट्रावती, त्रिशूली, ढुंगे र देवीघाटलगायत क्षेत्रमा क्षति भएको छ।
अहिलेसम्म मानवीय क्षतिको खबर नआएको प्रशासनले जनाएको छ। तर, बाढीले बजार क्षेत्रका संरचना बगाएकाले क्षति ठूलो भएको अनुमान गरिएको छ। क्षतिको यकिन विवरण भने संकलन भइरहेको छ।
प्रशासनले सुरक्षाकर्मीमार्फत घटनास्थलबाट विवरण संकलन गरिरहेको जनाएको छ। त्रिशूली र बेट्रावती आसपासका तटीय बस्तीका स्थानीयलाई सतर्क रहन आग्रह गरिएको छ।
