रसुवागढीमा बाढीको ठूलो क्षति, ९३ जना अझै बेपत्ता
२१ भदौ । रसुवाको भोटेकोशी नदीमा आएको विनाशकारी बाढीले रसुवागढी जलविद्युत् आयोजनामा ठूलो भौतिक क्षति पुर्याउनुका साथै त्यहाँ कार्यरत ९३ जना कर्मचारी तथा कामदारलाई सम्पर्कविहीन बनाएको छ। बाढीले आयोजनाको बाँधस्थल, पावरहाउस तथा कर्मचारी आवास क्षेत्रमा क्षति पुर्याएको बताइएको छ। सम्पर्कविहीन हुनेमा ५१ जना स्थायी कर्मचारी, दैनिक ज्यालादारीमा कार्यरत २ जना तथा ठेकेदार कम्पनीतर्फका ३९ जना जनशक्ति रहेका छन्। बाढी आएको १० दिन बितिसक्दा पनि उनीहरूको अवस्थाबारे यकिन जानकारी प्राप्त हुन नसकेपछि खोजी तथा उद्धार कार्यलाई निरन्तरता दिइएको छ।
