भारतीय राजदूत नवीन श्रीवास्तवको बिदाइ भेट, नेपाल–भारत सम्बन्ध र आपसी हितबारे छलफल
असोज १४। नेपालका लागि भारतीय राजदूत नवीन श्रीवास्तवले आफ्नो कार्यकाल पूरा गरी स्वदेश फर्किनुअघि राष्ट्रपति रामचन्द्र पौडेल र उपराष्ट्रपति रामसहायप्रसाद यादवसँग शिष्टाचार बिदाइ भेट गरेका छन्। मंगलबार भएको भेटमा नेपाल–भारतबीचको द्विपक्षीय सम्बन्ध, आपसी हित तथा साझा चासोका विषयमा छलफल भएको राष्ट्रपति कार्यालयले जनाएको छ। राष्ट्रपति पौडेलले राजदूत श्रीवास्तवलाई कार्यकाल सफलतापूर्वक सम्पन्न गरेकोमा बधाई दिएका छन्।
उपराष्ट्रपति रामसहायप्रसाद यादवसँगको भेटमा पनि नेपाल–भारतको ऐतिहासिक, सांस्कृतिक तथा मैत्रीपूर्ण सम्बन्धलाई थप मजबुत बनाउने विषयमा कुराकानी भएको थियो। उपराष्ट्रपति यादवले राजदूत श्रीवास्तवको कार्यकालमा दुई देशबीचको सहकार्यमा पुर्याएको योगदानप्रति धन्यवाद व्यक्त गर्दै हालैको बाढी तथा विपद्का क्रममा भारतबाट प्राप्त मानवीय सहयोगका लागि पनि आभार व्यक्त गरेका थिए।
राजदूत श्रीवास्तवले आफ्नो कार्यकालमा नेपाल र भारतबीचको सम्बन्ध थप घनिष्ट बनेको उल्लेख गर्दै नेपाल र नेपाली जनताको सम्झना सदैव रहने बताएका छन्। उनले करिब चार वर्षभन्दा बढी समय नेपालमा राजदूतका रूपमा काम गरेका थिए। कार्यकाल पूरा गरेपछि उनी भारत फर्किँदै छन्।
