नेपालका परराष्ट्रमन्त्री शिशिर खनाल फिजी जाने
असोज १६। परराष्ट्रमन्त्री शिशिर खनाल अक्टोबर ३ मा नेपाली प्रतिनिधिमण्डलको नेतृत्व गर्दै फिजी प्रस्थान गर्ने भएका छन्। फिजी र टुभालुमा अक्टोबर ५ र ६ मा आयोजना हुने जलवायु परिवर्तनसम्बन्धी **‘प्रि–कोप लिडर्स इभेन्ट’**मा सहभागी हुन उनी फिजी जान लागेका हुन्। परराष्ट्र मन्त्रालयका अनुसार नेपाली प्रतिनिधिमण्डलमा चार सदस्य रहनेछन्।
मन्त्री खनालले अक्टोबर ६ मा हुने लिडर्स प्लेनरीलाई सम्बोधन गर्ने कार्यक्रम रहेको छ। उक्त कार्यक्रममा जलवायु परिवर्तनका असर, जलवायु न्याय तथा हिमाली राष्ट्रका सरोकारका विषयमा नेपालको धारणा प्रस्तुत गर्ने अवसर प्राप्त हुने मन्त्रालयले जनाएको छ।
लिडर्स प्लेनरीअघि खनालले पलाउका राष्ट्रपति तथा अस्ट्रेलिया र फिजीका प्रधानमन्त्रीसँग संयुक्त रूपमा आयोजना हुने सञ्चारकर्मीको प्रश्नोत्तर कार्यक्रममा समेत सहभागिता जनाउने कार्यक्रम छ। प्रि–कोप बैठक कोप–३१ को तयारीका लागि उच्चस्तरीय छलफलका रूपमा आयोजना हुँदैछ।
फिजी र टुभालुको कार्यक्रमपछि परराष्ट्रमन्त्री खनाल अस्ट्रेलिया जाने र अक्टोबर ८ मा अस्ट्रेलियाकी विदेशमन्त्री पेनी वङसँग द्विपक्षीय भेटवार्ता गर्ने कार्यक्रमसमेत रहेको मन्त्रालयले जनाएको छ।
