बाढीपहिरोको प्रभाव: नेपाल टेलिकमको फोन र इन्टरनेट सेवा प्रभावित
असोज १२। लगातारको वर्षासँगै आएको बाढीपहिरोका कारण विभिन्न स्थानमा नेपाल टेलिकमको फोन तथा इन्टरनेट सेवा प्रभावित भएको छ। बाढी र पहिरोका कारण विद्युत् आपूर्ति तथा सञ्चार पूर्वाधारमा क्षति पुगेपछि केही क्षेत्रमा मोबाइल फोन, टेलिफोन र इन्टरनेट सेवा अवरुद्ध तथा कमजोर बनेको हो।
प्राकृतिक विपत्तिका कारण टेलिकमका केही उपकरण, प्रसारण संरचना तथा फाइबर नेटवर्कमा समेत असर परेको जनाइएको छ। सडक तथा यातायात अवरुद्ध भएका स्थानमा प्राविधिक टोलीलाई प्रभावित क्षेत्रमा पुगेर सेवा मर्मत गर्नसमेत कठिनाइ भइरहेको छ।
नेपाल टेलिकमले प्रभावित क्षेत्रमा सेवा पुनः सञ्चालन गर्न आवश्यक प्राविधिक जनशक्ति परिचालन गरी मर्मत तथा पुनःस्थापनाको काम अघि बढाएको जनाएको छ। बाढीपहिरोका कारण विद्युत् तथा सञ्चार संरचनामा थप क्षति हुन सक्ने भएकाले सेवा पूर्ण रूपमा सामान्य हुन केही समय लाग्न सक्ने बताइएको छ। आपत्कालीन अवस्थामा सञ्चार सेवा महत्वपूर्ण हुने भएकाले टेलिकमले प्रभावित नेटवर्कलाई प्राथमिकताका आधारमा सञ्चालनमा ल्याउने प्रयास गरिरहेको छ।
